Home TOP STORIES চীনৰ ভয়ানক ষড়যন্ত্রঃ ব্ৰহ্মপুত্ৰৰওপৰত সর্ব বৃহৎ জলবিদ্যুৎ প্রকল্পৰে উত্তৰ-পূব ধ্বংসৰ ব্লু প্রিন্ট

চীনৰ ভয়ানক ষড়যন্ত্রঃ ব্ৰহ্মপুত্ৰৰওপৰত সর্ব বৃহৎ জলবিদ্যুৎ প্রকল্পৰে উত্তৰ-পূব ধ্বংসৰ ব্লু প্রিন্ট

0

■ জনকল্যাণ বাৰ্তাৰ সেৱাঃ ব্ৰহ্মপুত্ৰক ভেটি উত্তৰ-পূব ধ্বংসৰ ষড়যন্ত্ৰ ৰচনা কৰিছে ৰঙা চীনে। ব্ৰহ্মপুত্ৰ নদৰ ওপৰত চীনে নিৰ্মাণ কৰি থকা বিশ্বৰ সৰ্ববৃহৎ জলবিদ্যুৎ বান্ধ প্রকল্পক কেন্দ্ৰ কৰি এতিয়া নতুনকৈ উদ্বেগ বৃদ্ধি পাইছে। বিশেষকৈ চীনৰ ভূতত্ত্ববিদসকলেই এই ‘মেগা’ প্ৰকল্পটোৰ ভৌগোলিক আৰু ভূতাত্ত্বিক বিপদ সন্দৰ্ভত সকীয়াই দিয়াত বিষয়টোৱে অধিক শংকাৰ সৃষ্টি কৰিছে। প্ৰায় ১৪৭.৮ বিলিয়ন মার্কিন ডলাৰ ব্যয়ৰে নিৰ্মিয়মান এই বৃহৎ বান্ধটো তিব্বতৰ ইয়াৰলুং ছাংপো নদীৰ ওপৰত অৱস্থিত। এই নদীয়ে পিছত ভাৰতত প্ৰৱেশ কৰি ছিয়াং আৰু তাৰ পিছত ব্ৰহ্মপুত্ৰ নাম লয়। ফলত এই প্ৰকল্পৰ প্ৰভাৱ ভাৰত আৰু বাংলাদেশলৈও পৰাৰ সম্ভাৱনা আছে। চীন চৰকাৰৰ সমর্থিত ভূতত্ত্ববিদসকলে উল্লেখ কৰিছে যে বান্ধটো য’ত নিৰ্মাণ কৰা হৈছে, সেই স্থানটো এটা ‘এক্টিভ ফল্ট লাইন’ বা সক্রিয় টেক্‌টনিক ফল্ট জনত অৱস্থিত। এই ফল্ট জ’নত নিৰন্তৰ ভূগাঁথনিগত লৰচৰ চলি থকাৰ ফলত অঞ্চলটো ভূমিকম্পীয়ভাৱে অত্যন্ত সংবেদনশীল বুলি গণ্য কৰা হয়। ইয়াৰ ফলত বৃহৎ মাত্ৰাৰ ভূমিকম্প, ভূমিস্খলন আৰু শিলাস্খলনৰ আশংকা বৃদ্ধি পাব পাৰে। ‘চেডিমেণ্ট্ৰেী জিঅ’লজী এণ্ড টিথাইন জিঅ’লজী ‘নামৰ চীনা আলোচনীত প্রকাশিত এক গৱেষণাত কোৱা হৈছে যে এই প্ৰকল্পটো দক্ষিণ-পূব তিব্বতৰ ‘গ্রেট বেণ্ড’ অঞ্চলৰ ওচৰত অৱস্থিত পাইজেন ফল্টত নিৰ্মাণ কৰা হৈছে। এই ফল্টটো প্ৰায় ২৬ লাখ বছৰ ধৰি সক্ৰিয় হৈ আছে আৰু এতিয়াও টেক্‌টনিক গতিবিধি অব্যাহত আছে। গৱেষকসকলৰ মতে, এনে স্থানত যিকোনো ধৰণৰ বৃহৎ আন্তঃগাঁথনি— দলং, সুৰংগ বা বান্ধ— স্থায়িত্বৰ ক্ষেত্ৰত গুৰুতৰ ঝুঁকিৰ সন্মুখীন হ’ব পাৰে। অধ্যয়নটোত আৰু কোৱা হৈছে যে ফল্ট লাইনৰ অবিৰত গতিৰ ফলত চাৰিওফালৰ পাহাৰ আৰু শিলৰ গঠন অস্থিৰ হৈ পৰিব পাৰে। ইয়াৰ ফলত প্রকল্প এলেকাত ভূপৃষ্ঠৰ বিকৃতি, ভূমিস্খলন আৰু প্ৰাকৃতিক দুৰ্যোগৰ সম্ভাৱনা বহুগুণে বৃদ্ধি পাব পাৰে। এই পৰিস্থিতিত ভূতত্ত্ববিদসকলে অঞ্চলটোত ক্রমাগত ভূতাত্ত্বিক পর্যবেক্ষণ অব্যাহত ৰাখিবলৈ পৰামৰ্শ আগবঢ়াইছে। ইয়াৰ পূৰ্বেও ভাৰত চৰকাৰে এই বান্ধ প্ৰকল্পক লৈ উদ্বেগ প্রকাশ কৰিছিল। বিশেষকৈ নদীৰ স্বাভাৱিক সোঁত, পৰিৱেশগত সমতা আৰু তলৰ দিশৰ ৰাজ্যসমূহৰ জনজীৱনৰ ওপৰত সম্ভাব্য প্রভাৱৰ কথা উল্লেখ কৰি দিল্লীয়ে একাধিকবাৰ বিষয়টো উত্থাপন কৰিছে। এইবাৰ চীনৰ ভূতত্ত্ববিদসকলৰ সতর্কবাণীয়ে ভাৰতৰ সেই উদ্বেগক অধিক গুৰুত্বপূৰ্ণ কৰি তুলিছে। বিশেষজ্ঞসকলৰ মতে, যদি এই বৃহৎ প্রকল্পটো সঠিকভাৱে পৰিচালিত নহয়, তেন্তে ইয়াৰ প্ৰভাৱ কেৱল চীনতেই নহয়, সমগ্র দক্ষিণ এছিয়াৰ পৰিৱেশ আৰু জনজীৱনৰ ওপৰত পৰিব পাৰে। সেইদৰে, ব্ৰহ্মপুত্ৰ নদৰ দৰে আন্তঃৰাষ্ট্ৰীয় গুৰুত্বৰ নদীত বৃহৎ প্রকল্প ৰূপায়ণৰ ক্ষেত্ৰত অধিক সতর্কতা, বৈজ্ঞানিক মূল্যায়ন আৰু আন্তঃৰাষ্ট্ৰীয় সমন্বয়ৰ প্ৰয়োজনীয়তা পুনৰ স্পষ্ট হৈ পৰিছে।

NO COMMENTS

LEAVE A REPLY

Please enter your comment!
Please enter your name here

Exit mobile version